Për përfundimin e autostradës Kërçovë – Ohër edhe 186 milionë të tjera ?

Me 186 milionë euro shtesë dhe një afat deri në qershor të vitit të ardhshëm do të përfundohet autostrada Kërçovë-Ohër. Për ndërtimin e plotë të kësaj rruge, ndërtimi i së cilës filloi 12 vjet më parë, do të nënshkruhet një aneks i ri i kontratës për ndërtim midis Ndërmarrjes Publike për Rrugë Shtetërore (NPRRSH) dhe kontraktorit kinez “Sinohydro”. Fondet shtesë janë të destinuara për stabilizimin e rrëshqitjeve të dheut për ndërtimin e 14 galerive, vendosjen e gardheve, ndërtimin e rrugëve paralele hyrëse të pa planifikuara për lidhje me zonat e banuara, si dhe për një qendër kontrolli për tunelet, raporton Meta, përcjell Portalb.mk.

Kuvendi dje i votoi ndryshimet në Ligjin për Realizimin e Projekteve Infrastrukturore për Ndërtimin e rrugës Milladinovc – Shtip dhe Kërçovë – Ohër, me të cilat parashihet Aneksi nr. 8 për autostradën me gjatësi prej 57 kilometrash, nga të cilat deri më tani janë lëshuar në përdorim rreth 40 kilometra.
“Për këtë projekt po punohet intensivisht dhe me këtë aneks më në fund do ta përfundojmë autostradën Kërçovë-Ohër”, tha zëvendëskryeministri dhe ministër i transportit, Aleksandar Nikolloski.

Sipas tij, fondet dhe koha shtesë janë të nevojshme për përfundimin e plotë të projektit me punime që nuk ishin parashikuar në projektin bazë.
“Për këtë qëllim ne parashikojmë stabilizimin e rrëshqitjeve të dheut. Do të ndërtohen 14 galeri përgjatë autostradës, do të kryhen punime shtesë për një gardh mbrojtës elastik me aplikimin e standardeve evropiane, të cilat nuk ishin paraparë aspak. Mjete financiare shtesë ka edhe për ndërtimin e një qendre kontrolli për tunelet që do t’i shërbejë edhe tunelit që do të ndërtohet në seksionin Kërçovë-Bukojçan”, tha Nikolloski.

Do të financohen edhe rrugë lidhëse që nuk ishin paraparë në planin fillestar, por që janë paraparë në anekset e mëparshme të marrëveshjes, të cilat janë të domosdoshme për funksionalitetin dhe lidhjen rrugore të vendbanimeve përgjatë autostradës. Këto janë rrugët lidhëse nga fshati Arbinovë deri në Izdegllavje, nga fshati Izdegllavje deri në Novo Sellë, nga Novo Sella deri në fshatin Botun, nga Mesheishta deri në Trebenishtë, nga Trebenishta deri në Podmol dhe deri në Ohër.

Me nënshkrimin e Aneksit nr. 8 investitori dhe realizuesi i punimeve janë dakord që realizuesi i punimeve ka të drejtë ta zgjasë afatin e përfundimit për 151 ditë të tjera. Pas 11 vitesh ndërtimi të autostradës Kërçovë-Ohër 20 kilometrat e parë u lëshuan në përdorim më 13 korrik të vitit të kaluar, në segmentin nga Vërbjani deri në Botun, ndërsa më 7 shtator një segment tjetër, Klimeshtani-Ohër me gjatësi prej 17 kilometrash. Deri në fund të vitit të kaluar për ndërtimin ishin realizuar 557.985.782 euro ose 93,3 përqind e shumës së planifikuar.

Kujtojmë se ndërtimi i autostradës Kërçovë – Ohër filloi në shkurt të vitit 2014 dhe po realizohet nga kompania kineze “Sinohydro”. Gjatësia e trasës është 57 kilometra, ndërsa vlera fillestare e kontratës ishte 373 milionë euro. Afati fillestar për përfundim ishte qershori i vitit 2018, por punimet janë shtyrë disa herë për shkak të problemeve serioze inxhinierike, juridike dhe administrative. Pikërisht për shkak të këtyre problemeve, çmimi është rritur dhe arrin rreth mbi 560 milionë euro. Ministri Aleksandar Nikollovski më 21 shkurt premtoi se ndërtimi i segmentit të autostradës Gostivar – Bukojçan po ecën me ritëm të fortë dhe pritjet janë që ai të vihet në funksion deri në fund të vitit 2029.

Korridori 8, i cili lidh Adriatikun me Detin e Zi përmes Shqipërisë, Maqedonisë dhe Bullgarisë, është pjesë e korridorit më të gjerë evropian të transportit Ballkani Perëndimor – Mesdheu Lindor dhe ka mbështetje të fortë nga Bashkimi Evropian.

/portalb