Autostrada Gostivar – Kërçovës duhet të përfundojë deri në fund të vitit 2029 ?

Ndërtimi i segmentit të autostradës Gostivar – Kërçovës po ecën me ritëm të fortë dhe pritjet janë që ai të vihet në funksion deri në fund të vitit 2029, tha zëvendëskryeministri dhe ministri i Transportit Aleksandar Nikolloski, i cili së bashku me kryeministrin Hristijan Mickoski, drejtorin e NPRRSH-së, Koce Trajanovski, u.d ambasadoren e SHBA-së, Nicole Varnes dhe përfaqësues të tjerë të qeverisë sot inspektuan punimet e ndërtimit përgjatë segmentit të Korridorit 8, transmeton Portalb.mk.

Seksioni Gostivar – Bukojçan është i ashtuquajturi “Seksioni 2” dhe është një segment kyç i krahut perëndimor të Korridorit 8, dhe sipas planeve, kjo rrugë duhet të lidhet me autostradën Tetovë – Gostivar nga veriu, ndërsa nga jugu do të lidhet me seksionin e ardhshëm Bukojçan – Kërçovë. Kjo duhet të mundësojë një lidhje të plotë autostrade me Ohrin dhe Strugën. Sipas Nikolloskit, shteti po i kryen detyrimet e veta me kohë dhe procesi i shpronësimit të tokës në këtë pjesë është realizuar me rreth 90 përqind, ndërsa ai gjithashtu informoi se deri më tani nga buxheti i shtetit janë paguar rreth 470 milionë euro për projektin.

“Ajo për të cilën jam i kënaqur është se ndërtimi po rritet. Në tremujorin e tretë të vitit të kaluar, rritja ishte 21 përqind, që është e paprecedentë në Maqedoninë e pavarur. Detyrimet që kishte shteti tashmë janë përfunduar, është siguruar e gjithë logjistika dhe mbetet që kompanitë të bëjnë punën e tyre”, tha Nikolloski.

Nikolloski theksoi se në rrugë po ndërtohen objekte serioze infrastrukturore, duke treguar një urë 40 metra të lartë. Sipas tij, përveç rëndësisë ekonomike, kjo përfaqëson edhe një mundësi të shkëlqyer për arsim praktik dhe punë në terren për studentët e Fakultetit të Ndërtimarisë dhe Arkitekturës.

Kujtojmë se ndërtimi i autostradës Kërçovë – Ohër filloi në shkurt të vitit 2014 dhe po realizohet nga kompania kineze “Sinohydro”. Gjatësia e trasës është 57 kilometra, ndërsa vlera fillestare e kontratës ishte 373 milionë euro. Afati fillestar për përfundim ishte qershori i vitit 2018, por punimet janë shtyrë disa herë për shkak të problemeve serioze inxhinierike, juridike dhe administrative. Pikërisht për shkak të këtyre problemeve, çmimi është rritur dhe sipas disa burimeve jozyrtare tani arrin mbi 600 milionë euro.

Korridori 8, i cili lidh Adriatikun me Detin e Zi përmes Shqipërisë, Maqedonisë dhe Bullgarisë, është pjesë e korridorit më të gjerë evropian të transportit Ballkani Perëndimor – Mesdheu Lindor dhe ka mbështetje të fortë nga Bashkimi Evropian.

/portalb