Limani kundër “moratoriumit” të Kasamit !

Vendosja e një “moratoriumi” mbi aktivitetet politike ka nxitur reagime dhe dilema brenda skenës politike, ndërsa ministri i Punës dhe Politikës Sociale dhe njëherësh anëtar i Kryesisë Qendrore në Lëvizjen BESA, Fatmir Limani, ka shprehur publikisht qëndrimin e tij kritik ndaj një qasjeje të tillë.

Në një reagim publik, ndërsa ka aluzuar në shkarkimin e Kryesisë Qendrore të BESËS, Limani thekson se pezullimi i aktiviteteve politike mund të konsiderohet masë organizative vetëm nëse është e arsyetuar, e konsultuar me strukturat dhe në funksion të stabilitetit të subjektit politik.

Sipas tij, çdo vendim që cenon funksionimin demokratik të strukturave rrezikon të dëmtojë vetë bazën që ka ndërtuar përfaqësimin politik deri në nivel qeverisës.

Ai ngre shqetësime serioze për mënyrën e konceptimit të një moratoriumi të tillë, duke vlerësuar se strukturat politike nuk mund të paralizohen përmes vendimeve të njëanshme, pasi ato përfaqësojnë vullnetin dhe angazhimin e anëtarësisë në terren. Limani nënvizon se funksionimi normal i strukturave, komunikimi me qytetarët dhe organizimi politik janë elemente thelbësore të jetës demokratike të çdo subjekti.

Sipas tij, çdo përpjekje për kufizimin e këtyre proceseve mund të prodhojë pasoja të kundërta nga ato që synohen, ndërsa vendimmarrja duhet të mbështetet në konsultim, transparencë dhe respektim të rolit të strukturave në të gjitha nivelet. Vetëm një qasje gjithëpërfshirëse, shton ai, mund të ruajë unitetin, besimin dhe funksionalitetin organizativ.

Në reagimin e tij, Limani shtron edhe një pyetje politike: nëse masa e moratoriumit do të vlejë edhe gjatë fushatës zgjedhore që pritet të pasojë së shpejti, duke lënë të kuptohet se pezullimi i aktivitetit politik në një periudhë të tillë do të ishte i papajtueshëm me logjikën e garës demokratike.

Ai përfundon se organizimi politik nuk ndërtohet mbi pezullime të imponuara, por mbi bashkëpunim, përgjegjësi dhe vendimmarrje kolektive, duke theksuar se veprimtaria politike që ka nisur me një mision të qartë nuk mund të ndalet nga masa administrative apo përplasje të brendshme.

Reagimi i Limanit vjen në një moment tensionesh të brendshme politike në Lëvizjen BESA, pasi kreu Bilall Kasami kërkoi shkarkimin e ministrit Limani, por që nul e arriti ta realizojë.

/(koha.mk)