Valbona Adili Emini : Reagim publik reth deponisë në Kërçovë

Si deputete e kësaj zone, ndjej detyrim moral dhe institucional të reagoj ndaj shqetësimit për vendosjen e deponive të mbeturinave qoftë edhe të përkohshme në afërsi të vendbanimeve.

Vendosja e mbeturinave pranë shtëpive të qytetarëve përbën rrezik serioz për mjedisin dhe mbi të gjitha për shëndetin publik. Deponitë janë burim i gazrave toksikë, ndotjes së tokës dhe ujërave nëntokësore, si dhe përhapjes së baktereve, viruseve dhe insekteve bartëse të sëmundjeve. Pasojat shëndetësore përfshijnë rritje të sëmundjeve respiratore, alergjive, infeksioneve të lëkurës, problemeve gastrointestinale, si dhe rrezik të shtuar për sëmundje kronike nga ekspozimi i vazhdueshëm ndaj ndotjes.

Situata rëndohet edhe më shumë nga ndotja e ajrit që vjen nga TEC Oslomej, duke krijuar një barrë të shumëfishtë për banorët e këtij rajoni. Qytetarët nuk mund të jetojnë mes tymit dhe mbeturinave, duke paguar me shëndetin e tyre për mungesë planifikimi dhe përgjegjësie.

E deklaroj qartë: jam kundër çdo deponie pranë vendbanimeve, pavarësisht si etiketohet ajo. Shëndeti i qytetarëve nuk është çështje kompromisi.
Kërkoj transparencë të plotë, konsultim me komunitetin dhe zgjidhje të qëndrueshme që garantojnë mbrojtjen e mjedisit dhe të jetës së njerëzve.
Në përfaqësim të qytetarëve të kësaj zone, do të qëndroj e palëkundur në mbrojtje të shëndetit dhe dinjitetit të tyre.

/ms