Maqedoni: Vlon tregu me mjaltë për “qejfli”..!?
A keni dëgjuar për mjaltin që rrit potencën dhe stimulon libidonë e dy gjinive? I gjen kudo në Maqedoni, në treg të zi! TV21 vizitoi një nga zonat ku lehtë mund të gjesh produkte të këtilla, të dyshimta për shëndetin.
“Ndërkaq Çarshia e Vjetër e Shkupit është epiqendra e shitjes ilegale të këtyre produkteve të pa certifikuara, pa banderola dhe pa deklaracion se çfarë përmbajtje kanë. Ndonëse në pikat e shitjes ato shiten si vajra bimore, çajra si dhe mjalte të ndryshme për dobësim dhe stimulim, ato nuk janë të certifikuara dhe janë të rrezikshme për shëndetin e njerëzve”, raporton Adnan Qaili – gazetar i TV21.
Shiten si suplemente ushqyese por në fakt, analizat laboratorike nxjerrin se janë kimikate e substanca që mund të çojnë në fatalitet. Investigimi i “Inside21” filmoi paketime të ndryshme pa deklaracione të përmbajtjes, produkte të cilat nuk lejohen të shiten në shitore kozmetike-ushqimore, përpos në farmaci të licencuara e me rekomandime të mjekut.
Por në mes të Çarshisë së Shkupit ka tezga të vendosura me të gjitha këto produkte. Në momentin e parë nuk rri askush pran deri sa ndonjë klinet të ofrohet. Një prej shitësve, që nuk deshi të flasë para kamerës, na tregoi se këto produkte janë ndër më të kërkuarat.
-Kemi edhe disa gjëra për potencë, krejt bio, d.m.th. nuk ka diçka që është e ndaluar!
Prej nga ju vijnë këto mjalta apo çfarë janë?
Përgjithësisht vijnë nga Turqia. Disa gjëra ka nga Pakistani dhe India. Disa gjëra i mbushim vetë i paketojmë, firma jonë ja kjo është ‘4N-Bio-Style’, ka shampona prej Tajlande.
A i keni me banderola, a i keni me deklarim?
A bën ta hapni një ta shohim siç duket?
S’po di cilën ja këto i ke të verifikuara, të paketuara. A ka në maqedonisht të shkruar?
Jo, këto vijnë nga Turqia.
Derisa këto paketime vijnë nga shtete të ndryshme, ngrihet pyetja se si kalojnë këto në Doganë dhe si nuk parandalohen?!
Nga Agjencia e Ushqimit dhe Veterinarisë janë të vetëdijshëm për shitjet në treg, nëpër dyqane kozmetike-ushqimore, në “Sex-Shop” por edhe online. Në AUV ka sektor për hetim të mashtrimeve, të cilët dalin në terren pas një konstatimi apo denoncimi ndaj një subjekti juridike apo person fizik që i shet, por nuk veprojnë për asgjësimin e plotë nga tregu i zi.
“Ne tani nuk kemi pasur konkretisht ndonjë paraqitje apo nismë për mbikëqyrje inspektuese për këto produkte. Kemi kryer kontrolle si inspektorat kompetent për këto mjalta, madje kemi konfiskuar mjalta për deklarim jo adekuat. I themi publikut që nëse nuk kanë deklarim llogaritet si një produkt jo i sigurt, pa informacionet e duhur për konsumatorin”, tha Boshko Stojkovski – Sektori inspektues në AUV.
Kërkuam sqarime nga Inspektorati Tregut përse nuk ndërmarrin aksione për heqjen e këtyre produkteve. Ndonëse në kompetencë të tyre janë pikërisht operimi subjekteve dhe individëve që shesin në të zezë produkte pa deklaracione, ata thonë se duhet aksioni të koordinohet me Agjencinë e ushqimit, të cilët janë kompetent për cilësinë dhe sigurinë e prodhimeve ushqimore.
/tv21
