Partitë fajësojnë njëra-tjetrën për rastin “Grubi”..!?
Artan Grubi vazhdon të jetë “mollë sherri” për partitë. VMRO i bëri thirrje LSDM-së që të kërkojë falje, për siç thonë, faktin që me vite e ka toleruar dhe nuk e ka denoncuar krimin e ish zv.kryeministrit në arrati. Deputeti i VMRO-DPMNE-së, Brane Petrushevski, madje akuzoi LSDM-në se i ka bërë ndryshimet në Kodin Penal, vetëm që të shpëtojë Artan Grubin dhe ata që janë të ngjajshëm me të.
“Edhe BDI edhe Universiteti i Tetovës, të gjithë u distancuan nga krimineli dhe i arratisuri Artan Grubi, përveç LSD-së. LSDM përskaj BDI-së janë më së shumëti fajtorë për faktin që Maqedonisë i ndodhi Grubi. Të mos ishte dëshira e tyre për pushtet me çdo çmim, ose do të nisnin një procedurë kundër Grubit, ose aspak nuk do të lejonin që të vie deri këtu”, tha Brane Petrushevski, deputet VMRO-DPMN.
Kreu i LSDM-së, Venko Filipçe në një intervistë për “Nezavisen”, theksoi BDI është simbol i korrupsionit dhe partia e tij distancohet qartë dhe pa mëdyshje.
“LSDM asnjëherë më nuk do të lejojë që të vendoset në të njejtën korrnizë apo të jetë i nënshtruar ndaj ndonjë partie tjetër. Stigma e korrupsionit, që kjo parti e mban për vite me rradhë, është diçka nga e cila ne distancohemi qartë dhe pa mëdyshje. Retorika e tyre dhe ngritja e vazhdueshme e tensioneve etnike, si një mjet për veprim politik, është e papranueshme dhe e rreezikshme”, thonë nga LSDM.
Koalicioni VLEN, nga ana tjetër, ka kërkuar nga BDI të reflektojë dhe ta përjashtojë Grubin nga partia.
“Bëjmë thirrje të qartë dhe të hapur deri te lidershipi i Bashkimit Demokratik për Integrim që të marrë masa konkrete dhe të dukshme për të ruajtur partneritetin strategjik të shqiptarëve të Maqedonisë së Veriut me Shtetet e Bashkuara të Amerikës dhe të dëshmojë se shqiptarët nuk do të mbahen peng i krimit. Kërkojmë që BDI të marrë vendim formal për përjashtimin e Artan Grubit nga anëtarësia partiake”, thonë nga VLEN.
Ish zv.kryeministri Artan Grubi është i pakapshëm për organet e rendit për pothuajse një muaj. Grubi kërkohet me fletarrest ndërkombëtar, njëjtë sikurse edhe Përparim Bajrami, ish drejtor i Lotarisë Shtetërore. Që të dy dyshohen se kanë dëmtuar buxhetin e shtetit në vlerë prej mbi 8.2 milion euro.
Ata ngarkohen për veprën penale “mashtrim në shërbim” sipas nenit 354 të kodit penal, e cila parashikon dënim me të paktën katër vjet burg. Paraprakisht Grubi përfundoi në Listën e Zezë Amerikane për korrupsion dhe ndërhyrje në proceset gjyqësore për të shpëtuar Sasho Mijallkovin.
/Alsat.mk
