“Antishqiptare” e quajti Osmani mbledhjen në Prishtinë, i reagon Mexhiti..
“Preskonferencë e turpshme dhe antishqiptare. Gjuha shqipe është zyrtare dhe e garantuar me kushtetutë dhe ligj.”
Me këto fjalë, ish ministri i Punëve të Jashtme nga radhët e BDI-së, Bujar Osmani ka vlerësuar mbledhjen dhe paraqitjen para mediave të krerëve qeveritarë të Kosovës dhe Maqedonisë së Veriut pas mbledhjes së përbashkët dhe ku u dhanë deklarata për gjuhën shqipe.
Osmani kësaj deklarate ia ka bashkëngjitur edhe pjesën e Ligjit të gjuhëve ku mes tjerash citohet se “gjuhë tjetër që e flasin së paku 20% e qytetarëve (gjuha shqipe), gjithashtu është gjuhë zyrtare dhe alfabeti i saj, në pajtim me këtë ligj”.
Ndaj kësaj deklarate ka reaguar zëvendëskryeministri i parë, Izet Mexhiti.
Në reagimin që e fillon me “dy fjalë drejtuar Ministrit në kllapa”, Mexhiti thotë se “patetike dhe qesharake, për të mos thënë të turpshme, janë përpjekjet e tyre (BDI) për ta njollosur mbledhjen e përbashkët të dy qeverive që u mbajt në Prishtinë”.
Mexhiti thotë se nga Osmani ka pritur vlerësim pozitiv.
“Por, për fat të keq, ashtu siç e harxhove mandatin tënd- me shumë fasadë dhe aspak përmbajtje, ashtu zgjodhe të flasësh edhe sot – si një militant partiak që nuk arrin të ngrihet përtej retorikave folkloriste e manipulatore!
Dhe deklarata jote e sotme nuk do koment të veçantë sepse ishte e vetëmjaftueshme – duke cituar ‘Ligjin për përdorimin e gjuhëve’, e citove nenin i cili gjuhën shqipe e përkufizon si gjuhë në kllapa! Pra – aspak zyrtare, aspak formale, aspak e barabartë me maqedonishten – thjeshtë, gjuhë në kllapa.
Po po, ndërkohë që e votove miratimin e Ligjit për supremacionin e gjuhës maqedonase si gjuhë e parë e shtetit, pranove dhe lejove që shqipja, për të cilën është derdhur gjak, të ngelet thjeshtë, gjuhë e shpjeguar në kllapa”, shkruan mes tjerash Mexhiti.
/tv21
