SHBA-ja nis sulmet ajrore në Lindjen e Mesme, godet 85 objektiva në Siri dhe Irak..

Komanda Qendrore e Shteteve të Bashkuara të Amerikës ka konfirmuar se forcat e saj po kryejnë sulme ajrore në Irak dhe Siri kundër Forcës Quds të Gardës Revolucionare Islamike të Iranit (IRGC).

Sipas Komandës, forcat ushtarake amerikane kanë goditur më shumë se 85 objektiva duke përfshirë “operacionet e komandës dhe kontrollit, qendrat e inteligjencës, raketat, dhe depot e mjeteve ajrore pa pilot, dhe objektet e zinxhirit të furnizimit të logjistikës dhe municionit që u përkisnin grupeve të milicisë dhe sponsorëve të tyre të IRGC-së”. Janë përdorur më shumë se 125 predha.

Media shtetërore siriane ka raportuar se “agresioni amerikan” ka shkaktuar vdekje e lëndime.
Shtetet e Bashkuara të Amerikës kanë nisur sulmet ajrore mbi objektivat iraniane në Siri dhe Irak, kanë konfirmuar zyrtarët amerikanë të premten në mbrëmje, raportojnë Fox News dhe ABC News.

Sulmet vijnë më pak se një javë pasi tre ushtarë amerikanë u vranë nga një sulm me dron në bazën amerikane në Jordani.
Vrasja e tre ushtarëve amerikanë nxiti reagime të shumta. Sulmi u krye nga grupi i mbështetur nga Irani, “Kata’ib Hezbollah”. Megjithatë, Irani e ka mohuar përfshirjen – pavarësisht akuzave nga SHBA-ja. Por droni me të cilin u sulmua baza amerikane ishte prodhuar nga Irani.

Presidenti i SHBA-së, Joe Biden, ditë më herët ka paralajmëruar se ka vendosur mënyrën se si do t’i përgjigjet sulmit ndaj bazës amerikane në Jordani të dielën.
Grupet militante kanë kryer më shumë se 170 sulme në bazat amerikane në rajon që nga 7 tetori. SHBA-ja ka thënë se e di kush janë dhe ku gjenden militantët.

/tv21