Lidhja e Diasporës së Bashkuar Kërçovare bën ftesë për aksion të përbashkët politik

Realizimi i objektivave madhore-kombëtare nuk mund të arrihet nga një forcë e vetme, pa bashkëpunim dhe bashkërendim politik.
Nisur nga situata, në përgjithësi, shumë e vështirë e bashkëvendësve në Vendlindje dhe viseve shqiptare nën Maqedoninë e Veriut dhe kërkesat e bashkëkombësve për ndyshimin e saj, Lidhja e Diasporës së Bashkuar Kërçovare mbështet këtë nismë dhe u bën ftesë forcave të shëndosha politike-kombëtare për aksion të përbashkët politik.

LDBK, e vetëdijshme se bashkëkombasit në Vendlindje janë të organizuar në më shumë grupime politike dhe kombëtare, nuk mban anë politike por mbështet, në përputhje me statutin e saj, të gjitha ato subjekte që bashkohen dhe bashkërendohen në të mirë të shoqërisë në Vendlindje dhe bashkatdhetarëve në Diasporë.

Gjatë rrugëtimit të tyre politik-kombëtar, subjektet politike në Vendlindje nuk arritën bashkëveprimin, aq të domosdoshëm, për përmirësimin e jetës së qytetarëve dhe zhvillimin e shoqërisë. Si rezultat, qytetarët u detyruan të kërkojnë zgjidhjen e problemeve të jetës së përditshme jashtë Atdheut. Kjo çoi në zbrazjen e shkollave, mbylljen e shtëpive, braktisjen e viseve.

Por bashkatdhetarët në Diasporë nuk e braktisin vërtetë Vendlindjen. Ato jetojnë me trup në Diasporë ndërsa mendjet, zemrat dhe sytë i mbajnë të drejtuar nga Vendlindja.
Sa herë që mundësia ua lejon ato kthehen me kënaqësi në Vendlindje dhe japin kontributin e tyre në zhvillimin e saj.
Realizimi i objektivave madhore-kombëtare nuk mund të arrihet nga një forcë e vetme, pa bashkëpunim dhe bashkërendim politik.

Realizimi i objektivave madhore-kombëtare nuk mund të arrihet me mendësi të vjetëruar, me gjuhë të papërshtatshme politike dhe me mendjemadhësi.
Realizimi i objektivave madhore-kombëtare nuk mund të arrihet pa angazhimin e Diasporës si pjesë e pandashme e shoqërisë shqiptare.

Lidhja e Diasporës së Bashkuar Kërçovare uron dhe shpreson se kjo ftesë nuk do të has në vesh të shurdhër, sidomos të forcave të mirëfillta kombëtare dhe do të gjejnë mënyrat dhe mundësitë të bashkojnë forcat dhe energjitë në të mirë të interesit të përgjithshëm.

LDBK do të jetë në krah të interesit të përgjithshëm dhe bashkëpunimit e bashkërendimit të forcave të gjalla dhe mirëfillta kombëtare.
Lidhja e Diasporës së Bashkuar Kërçovare Milaim Ziberi
Më 18 Shtator 2023

/ ms