Zajaz Ukaj dhe Zajaz Tunell me rrugë të shkatërruara, mbeturinat mbi fshat problem më vete..(VIDEO)
Këto rrugë janë në fshatin Zajaz Ukaj dhe Tunell.
Me gropa, të prishura dhe të pa asfaltuara që në vitin 1990.
Për shkak të shkatërrimit të rrugës, në kohë me shi edhe kanali mbushet me rërë dhe uji del në rrugë.
“Infrastruktura është siç e shihni, gjendja është katastrofë, për momentin me infrastrukturën jemi zero”, tha Argëtim Qamili, kryetar i bashkësisë lokale Zajaz Ukaj.
Rruga është shkatërruar tërësisht sepse mbi këtë fshat ka një gurore, e gjatë ditës kalojnë shumë kamionë me peshë të rëndë. Kjo ka bërë që rruga të bëhet thuajse e pa kalueshme.
“Këtu kalojnë lloj-lloj kamionësh dhe ato kamionë përveç që bartin mbeturina dhe e shkatërrojnë rrugën dhe vazhdojnë atje lartë ka një gurore e cila e zhvillon biznesin e saj, ne nuk jemi kundër por gjithë ato kamionë me atë peshë të madhe, këtu shkaktojnë prishjen e rrugëve, të njëjtat kamionë apo kamionë tjerë kush shkojnë bartin mbeturina dhe kur kthehen me atë biznesin e tyre që e zhvillojnë”, pohoi Agim Rijani, banor.
Duke marrë për bazë fshatrat e tjerë ku ka gurore dhe ligjit për funksionimin e guroreve, kompania e cila kalon përmes fshatit duhet t’i mirëmbaj rrugët me asfalt, madje duhet që tre herë në ditë rruga të lahet me ujë që mos dëmtohen banorët e zonës dhe të mos krijohet pluhur.
E problemi tjetër është edhe hedhja e mbeturinave mbi fshat, ku disa hidhen dhe mbulohen me dhé, ndërsa të tjerat lihen rreth rrugës.
“Me mbeturinat jemi mund të të them lirisht si deponi është, me mbeturinat jemi katastrofë, lartë është full me mbeturina”, theksoi Argëtim Qamili, kryetar i bashkësisë lokale Zajaz Ukaj.
“Po të shkoni lart do të shihni se atje është deponi e egër mbeturinash, atje kemi shumë problem sepse mbesin atje dhe pastaj kur fillon shiu të gjitha ato ujërat e zaza na vijnë poshtë”, deklaroi Agim Rijani, banor.
Banorët thonë se janë interesuar në komunë, por nuk kanë marrë përgjigje e së fundmi ju kanë thënë se rruga është në program për tu ndërtuar këtë vit. Nga komuna për TV21 thanë se rruga do të rregullohet shumë shpejtë dhe banorët e këtyre lagjeve do të ecin në rrugë të asfaltuara dhe pa gropa. Ky fshat ka 120 shtëpi, kryesisht në mërgim, rinia është në numër të vogël sepse mbi 70% janë jashtë vendit por edhe ata që janë nuk janë të punësuar thonë banorët.
VIDEO:
/tv21
